(၂၀၂၄-၂၀၂၅) ပညာသင်နှစ် ကျောင်းတွင်းအာဟာရကျွေးမွေးခြင်းလုပ်ငန်း မိတ်ဆက်အသိပေးခြင်း အခမ်းအနားသို့ ပညာရေးဝန်ကြီးဌာန၊ ပြည်ထောင်စုဝန်ကြီးနှင့် ကျန်းမာရေးဝန်ကြီးဌာန၊ ပြည်ထောင်စုဝန်ကြီးတို့ တက်ရောက်

    (၂၀၂၄-၂၀၂၅) ပညာသင်နှစ် ကျောင်းတွင်းအာဟာရ ကျွေးမွေးခြင်းလုပ်ငန်း မိတ်ဆက် အသိပေးခြင်း အခမ်းအနားကို ကျန်းမာရေးဝန်ကြီးဌာန၊ ရုံးအမှတ် (၄)၊ Meeting Hall ၌ ယနေ့ နံနက် (၉:၀၀)နာရီတွင် ကျင်းပခဲ့ပါသည်။ ပထမဦးစွာ ပညာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာညွန့်ဖေမှ အမှာစကားပြောကြားရာတွင် ကျောင်းတွင်းအာဟာရကျွေးခြင်းလုပ်ငန်းသည် အမျိုးသားအဆင့် မဟာဗျူဟာစီမံကိန်း၊ အမျိုးသားပညာရေးမဟာဗျူဟာစီမံကိန်း၊ လူမှုကာကွယ် စောင့်ရှောက်ရေးမဟာဗျူဟာ၊ ကျန်းမာရေးဝန်ကြီးဌာန၏ အမျိုးသားအဆင့် ကျောင်းကျန်းမာရေး မဟာဗျူဟာ စီမံကိန်းတို့နှင့် ချိတ်ဆက်မှု ရှိပါကြောင်း၊ ပညာရေးသည် မိသားစုဝင်ငွေ မြင့်မားစေခြင်း၊ တစ်ဦးချင်းစီနှင့် မိသားစုကျန်းမာရေးမြှင့်တင်ပေးခြင်း၊ လူမှုအဖွဲ့အစည်းများကို အားဖြည့်ပေးပြီး Sustainable Development Goals (SDGs)များဖြစ်သည့် အရည်အသွေးပြည့်ဝသော ပညာရေး ရရှိရေး၊ သင့်တင့်လျောက်ပတ်သော အလုပ်အကိုင်နှင့် စီးပွားရေး ဖွံ့ဖြိုးမှုရရှိစေရေးများအတွက် အထောက်အပံ့ပြုပါကြောင်း၊ ပညာရေးဝန်ကြီးဌာန၊ အခြေခံပညာသင်ရိုး ညွှန်းတမ်းအသစ်များတွင် အာဟာရပညာပေး သင်ခန်းစာများကို ထည့်သွင်းရေးဆွဲသင်ကြား လေ့ကျင့်ပေးလျက် ရှိသကဲ့သို့ မိဘ များအနေနှင့် ကျန်းမာရေး၊ အာဟာရဖွံ့ဖြိုးရေးနှင့် သန့်ရှင်းရေးဆိုင်ရာအလေ့အကျင့်ကောင်းများ နှင့်ပတ်သက်၍ ပိုမိုသိရှိလာစေရန် မိဘ၊ ရပ်ရွာလူထုနှင့် ပူးပေါင်းဆောင်ရွက်လျက် ရှိပါကြောင်း၊   ကျန်းမာရေးဝန်ကြီးဌာနမှ ဦးဆောင်၍ ကျောင်းတွင်း အာဟာရကျွေးမွေးခြင်း လုပ်ငန်းများ အရှိန် အဟုန် မြှင့်တင်ဆောင်ရွက်ခြင်းဖြင့် ကျောင်းသား၊ ကျောင်းသူများနှင့် ၎င်းတို့၏ မိသားစုများ ကျန်းမာ ရေးနှင့် ညီညွတ်သော အစားအသောက်ပုံစံများနှင့် အလေ့အကျင့်ကောင်းများကို ပိုမိုသိရှိနားလည်၍ လိုက်နာကျင့်သုံးခြင်းဖြင့် ကျန်းမာကြံ့ခိုင်သော ကျောင်းသား၊ ကျောင်းသူ အနာဂတ်သားကောင်းများ ကို မွေးထုတ်ပေးနိုင်မည်ဖြစ်သောကြောင့် ပညာရေးဝန်ကြီးဌာနအနေဖြင့် ပူးပေါင်းပါဝင်ဆောင်ရွက် သွားမည်ဖြစ်ပါကြောင်း ပြောကြားခဲ့ပါသည်။

      ထို့နောက် ပြည်ထောင်စုဝန်ကြီးများနှင့် ဧည့်သည်တော်များသည် အမှတ်(၁၁) အခြေခံပညာ အထက်တန်းကျောင်း၊ နေပြည်တော်သို့ သွားရောက်ပြီး ကျန်းမာရေးဝန်ထမ်းများ၊ ဆရာ၊ ဆရာမများ၊ မိဘများက စုပေါင်းချက်ပြုတ်ကြရာတွင် အစားအစာများကို အစာအုပ်စု(၃)အုပ်စုပေါ်မူတည်၍ ရွေးချယ်ခြင်း၊ အာဟာရတန်ဖိုး လျော့နည်းမှု အနည်းဆုံးဖြစ်စေရန်နှင့် ဘေးအန္တရာယ် ကင်းရှင်းစေ ရန် ချက်ပြုတ်ပြင်ဆင်ပုံကို လက်တွေ့သရုပ်ပြ ပညာပေးခြင်း၊ KG ကျောင်းသား၊ ကျောင်းသူများအား နေ့လယ်စာအဖြစ် တွက်ချက်ထားသည့် အစာအုပ်စု (၃) အုပ်စု ပါဝင်သော ထမင်း၊ ကြက်ဥ၊ သီးစုံပဲ ဟင်း၊ ငှက်ပျောသီး တို့ကို ကျွေးမွေးခြင်း၊ အဏုအာဟာရမှုန့် ဖြည့်စွက်တိုက်ကျွေးခြင်း၊ နေ့လယ်စာ မစားမီ စနစ်တကျ လက်ဆေးခြင်း၊ နေ့လယ်စာစားခြင်း၊ နေ့လယ်စာစားပြီး သွားတိုက်ခြင်း စသည့် လုပ်ငန်းများ ဆောင်ရွက်နေမှုကို ကြည့်ရှုအားပေးခဲ့ပါသည်။