MINISTRY OF HEALTH

နေပြည်တော်၊ (၂၀၂၀) ပြည့်နှစ်၊ ဇူလိုင်လ (၁၂) ရက်နေ့

     ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေးသည် ဇူလိုင်လ (၁၁) ရက်နေ့၊ နံနက်ပိုင်းတွင် ကျန်းမာရေးနှင့်အားကစားဝန်ကြီးဌာန၊ ရုံးအမှတ် (၄)၊ နေပြည်တော်၌ ပြုလုပ်ခဲ့သည့် Mobile Tablet အသုံးပြု၍ တစ်နိုင်ငံလုံးရှိ ပြည်သူ့ကျန်းမာရေးကြီးကြပ် (၂) များအတွက် မွမ်းမံသင်တန်း ပေးနိုင်ရန် ဆရာများအားသင်တန်းပေးခြင်းဖွင့်ပွဲအခမ်းအနားသို့ တက်ရောက်၍ အမှာစကားပြောကြားခဲ့ပါသည်။

     ပြည်ထောင်စုဝန်ကြီးက ပြောကြားရာတွင် -

• မိမိတို့မြန်မာနိုင်ငံတွင် အင်တာနက်ကွန်ရက်ဆက်သွယ်မှုများ၊ အီလက်ထရောနစ်ကိရိယာများ ပိုမို တိုးတက်ဖွံ့ဖြိုးလာသည်နှင့်အညီ ဝန်ကြီးဌာန၏ မွမ်းမံသင်တန်းများ၊ စွမ်းဆောင်ရည်မြှင့်တင်မှု သင်တန်းများကို ယခု COVID-19 ဖြစ်ပွားနေသည့်ကာလမှ စတင်၍ အင်တာနက်ကွန်ရက်အသုံးပြုသင်ကြားသင်ယူမှု (e learning) စနစ်ဖြင့် ပိုမို အားဖြည့်ပြုလုပ်တော့မည် ဖြစ်ပါကြောင်း၊

• ဝန်ကြီးဌာနအနေဖြင့် တိုင်းဒေသကြီး/ ပြည်နယ် (၁၂) ခုရှိ အခြေခံကျန်းမာရေးပညာရှင်ဝန်ထမ်းများ၊ တိုက်နယ်နှင့် မြို့နယ်ဆရာဝန်များထံ Mobile Tablet စုစုပေါင်း (၂၀,၀၀၀) ကျော်ကို ဖြန့်ဝေ ခဲ့ပြီးဖြစ်သဖြင့် ၎င်း Mobile Tablet များမှ တစ်ဆင့် အမျိုးမျိုးသော ကုသရေးနှင့် ပြည်သူ့ကျန်းမာရေးဆိုင်ရာ ဘာသာရပ်များအား စနစ်တကျ စီမံချက်များရေးဆွဲကာ မွမ်းမံသင်တန်းများပေးခြင်းများ ဆောင်ရွက်ရန် ညွှန်ကြားထားပြီးဖြစ်ပါကြောင်း၊

• ကျန်တိုင်းဒေသကြီး/ ပြည်နယ် (၅) ခုသို့လည်း Mobile Tablet များ ဆက်လက်ဖြန့်ဝေရန် စီစဉ်လျက်ရှိပါကြောင်း၊

• အဆိုပါ Mobile Tablet များတွင် လုပ်ငန်းလမ်းညွှန်များ၊ လုပ်ထုံးလုပ်နည်းများနှင့် ကျန်းမာရေး အသိပညာပေးနှိုးဆော်မှုဆိုင်ရာ စာအုပ်စာတမ်းများ၊ အသုံးချ application များထည့်သွင်းထားရှိပြီး ဖြစ်ပါကြောင်း၊ ၎င်း Mobile Tablet များကို ဝန်ကြီးဌာနမှ ပြုလုပ်ကျင်းပလျက်ရှိသော Videoconferencing အစည်းအဝေးများတက်ရောက်ရာတွင်လည်း စတင်အသုံးပြုလျက်ရှိနေပြီဖြစ်ပါကြောင်း၊

• ဝန်ကြီးဌာန၏ ကျန်းမာရေးစောင့်ရှောက်မှုလုပ်ငန်းများအား ရှေ့တန်းမှဆောင်ရွက်နေသည့် အခြေခံ ကျန်းမာရေးပညာရှင်ဝန်ထမ်းများ၏ အသိပညာဗဟုသုတမြင့်မားခြင်း၊ စွမ်းဆောင်ရည်မြင့်မား ခြင်းဖြင့် ဝန်ကြီးဌာန၏ ပညာရှင်ဝန်ထမ်းတစ်ဦးချင်းစီအတွက် အကျိုးရှိရုံသာမက ၎င်းတို့ ကျန်းမာရေးစောင့်ရှောက်မှုပေးနေသည့် ပြည်သူများအတွက်လည်း များစွာအကျိုးရှိစေမည်ဖြစ်ပါ ကြောင်း၊

• လက်ရှိစာရင်းများအရ ကျေးလက်ကျန်းမာရေးဌာန (၁,၈၄၉)ခု၊ ကျေးလက်ကျန်းမာရေးဌာနခွဲပေါင်း (၈,၇၀၀)ခု၊ မိခင်ကလေးကျန်းမာရေးဌာန (၃၄၈) ခုနှင့် ဒေသန္တရကျန်းမာရေးဌာန/ ဌာနခွဲ (၉၃) ခုတို့တွင် အခြေခံကျန်းမာရေးပညာရှင်ဝန်ထမ်း (၃၀,၀၀၀) ကျော်ခန့် တာဝန်ထမ်းဆောင်နေပါကြောင်း၊

• အခြေခံကျန်းမာရေးပညာရှင်ဝန်ထမ်းများက ကျေးလက်တောရွာများဒေသများ၌ Mobile Tablet တွင်ပါဝင်သော ကျန်းမာရေးဆိုင်ရာစံပြုအချက်အလက်များ (Standardized Health Messages)နှင့် အသုံးချ ကျန်းမာရေးအသိပညာပေး application များကို အသုံးပြုကာ "ကျန်းမာရေး စကားဝိုင်းငယ်"များကို ပြုလုပ်လျက်ရှိရာ ရေရှည်ကာလ၌ ပြည်သူများတွင် ကျန်းမာရေးအသိပညာ ဗဟုသုတများ ကြွယ်ဝလာမည်ဖြစ်ပါကြောင်း၊

• ကျန်းမာရေးအသိပညာဗဟုသုတကြွယ်ဝကာ ကျန်းမာရေးကောင်းမွန်စေသည့် နေထိုင်စားသောက်မှု ပုံစံများကို ပြုမှုကျင့်ကြံခြင်းနှင့် ရောဂါကာကွယ်ရေးနည်းလမ်းများကို လိုက်နာခြင်းတို့ဖြင့် ပြည်သူများ ပိုမိုကျန်းမာလာကြမည်ဖြစ်ပါကြောင်း၊

• ပြည်သူများတွင် ရောဂါဖြစ်ပွားမှုများနည်းပါးလာခြင်းဖြင့် ၎င်းရောဂါများကိုကုသရန် အသုံးပြုရမည့် ဝန်ကြီးဌာန၏ ဘဏ္ဍာငွေကုန်ကျမှုလည်းနည်းပါးလာမည်ဖြစ်သဖြင့် အဆိုပါ ဘဏ္ဍာငွေများကို အဆင့်မြင့် စက်ပစ္စည်းကိရိယာများဝယ်ခြင်း၊ ဆေးရုံ အဆင့်မြှင့်တင်ခြင်းတို့ အပါအဝင် ကျန်းမာရေးစနစ် ပိုမိုတိုးတက်ဖွံ့ဖြိုးရေးအတွက် ရင်းနှီးမြုပ်နှံဆောင်ရွက်သွားနိုင်မည်ဖြစ်ပါကြောင်း၊

• ဤဆရာဖြစ်သင်တန်းမှ စတင်၍ ဆက်လက်ပြုလုပ်မည့် ဆင့်ပွားသင်တန်းများအား တိုင်းဒေသကြီး/ ပြည်နယ်များရှိ မြို့နယ်အလိုက် ပြုလုပ်ရန် အစီအစဉ်ရေးဆွဲထားပြီး ဖြစ်ပါကြောင်း၊

• ဝန်ကြီးဌာနအနေဖြင့် တိုင်းဒေသကြီး/ ပြည်နယ်အလိုက်၊ အခြေခံကျန်းမာရေးပညာရှင်ဝန်ထမ်းအဆင့် အလိုက် Mobile Tablet တွင် ပါဝင်သော ကျန်းမာရေးအသိပညာဗဟုသုတ၊ လုပ်ငန်း လမ်းညွှန်နှင့် လုပ်ထုံးလုပ်နည်းများအား နားလည်မှုနှင့် အသုံးချနိုင်မှုတို့ အပါအဝင် Mobile Tablet အား အကျိုးရှိ ထိရောက်စွာ အသုံးချနိုင်စေရန် ရည်ရွယ်ကာ ထိုက်တန်သော ဆုကြေးငွေများ ပေးအပ်မည့် ပြိုင်ပွဲများကိုလည်း တိုင်းဒေသကြီး/ ပြည်နယ်အလိုက် ယခုနှစ်အတွင်း ပြုလုပ်သွားမည် ဖြစ်ပါကြောင်း၊

• ဝန်ကြီးဌာနမှ ကျင်းပခဲ့သော အခြေခံကျန်းမာရေးပညာရှင်ဝန်ထမ်းများညီလာခံတွင် ဆွေးနွေး အကြံပြုချက်များကိုလည်း ဆက်လက်အကောင်အထည်ဖော်ဆောင်ရွက်သွားစေလိုပါကြောင်း၊

• ဝန်ကြီးဌာနမှ ဆောင်ရွက်နေသော လုပ်ငန်းများကို သိရှိစေရန်နှင့် သက်ဆိုင်ရာတိုင်းဒေသကြီး/ ပြည်နယ်များတွင် အကောင်အထည်ဖော်ဆောင်ရွက်ရန်အတွက် တာဝန်ရှိသူများအနေဖြင့် ဝန်ကြီးဌာန၏ အင်တာနက်စာမျက်နှာနှင့် လူမှုကွန်ရက်စာမျက်နှာများကို ပုံမှန်လေ့လာကြည့်ရှုကြစေ လိုပါကြောင်း၊

• ယခုကဲ့သို့ မွမ်းမံသင်တန်းများသာမက ဝန်ကြီးဌာနရှိ eHealth ဌာနခွဲမှ Mobile Tablet များကို အသုံးပြု၍ မိမိကိုယ်တိုင် စိတ်ကြိုက်အချိန်တွင် လေ့လာလိုသည် သင်ခန်းစာအား လေ့လာသင်ယူ နိုင်သောသင်တန်း (Self-Paced E-Learning) သင်ခန်းစာများကိုလည်း ရေးဆွဲဆောင်ရွက်လျက် ရှိရာ ဝန်ကြီးဌာနရှိ ဝန်ထမ်းများအနေဖြင့် အကျိုးရှိထိရောက်စွာ အသုံးချကြစေလိုပါကြောင်း ပြောကြားခဲ့ပါသည်။

     ဆက်လက်၍ ပြည်သူ့ကျန်းမာရေးဦးစီးဌာနမှ ဒုတိယညွှန်ကြားရေးမှူးချုပ် (ပြည်သူ့ကျန်းမာ)ဒေါက်တာထင်လင်းက သင်တန်းနှင့် ပတ်သက်၍ အကျဉ်းချုံးတင်ပြခဲ့ပါသည်။

     အဆိုပါ ဆရာဖြစ်သင်တန်းသို့ တိုင်းဒေသကြီး/ ပြည်နယ်အသီးသီးမှ ဒုတိယတိုင်းဒေသကြီး/ ပြည်နယ် ပြည်သူ့ကျန်းမာရေး ဦးစီးဌာနမှူးများနှင့် မြို့နယ်ကျန်းမာရေးမှူးများတက်ရောက်ခဲ့ပြီး (၃) ရက်တာ သင်တန်းပြုလုပ်သွားမည်ဖြစ်ပါသည်။