ကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခဒေါက်တာသက်ခိုင်ဝင်း ဆေးတက္ကသိုလ်-တောင်ကြီး၊ (၁၀)နှစ်ပြည့် အထိမ်းအမှတ်အခမ်းအနားသို့ တက်ရောက်ဂုဏ်ပြုအမှာစကား ပြောကြား

တောင်ကြီးမြို့ ၊၂၀၂၅ ခုနှစ် အောက်တိုဘာလ ၃ ရက်

     ဆေးတက္ကသိုလ်-တောင်ကြီး၊ (၁၀)နှစ်ပြည့် အထိမ်းအမှတ် အခမ်းအနားကို အောက်တိုဘာလ(၃)ရက် နံနက်ပိုင်းက ရှမ်းပြည်နယ်၊ တောင်ကြီးမြို့ ဆေးတက္ကသိုလ်-တောင်ကြီး၊ ပင်မဆောင် ဥပစာ၌ ကျင်းပသည်။

     ဦးစွာ ကျန်းမာရေးဝန်ကြီးဌာန၊ ပြည်ထောင်စုဝန်ကြီး ဒေါက်တာသက်ခိုင်ဝင်းနှင့် ရှမ်းပြည်နယ်ဝန်ကြီးချုပ် ဦးအောင်အောင်တို့ ဦးဆောင်၍ ဖွင့်ပွဲကို ဖဲကြိုးဖြတ် ဖွင့်လှစ်ပေးကြပြီး (၁၀)နှစ်ပြည့် အထိမ်းအမှတ် ဈေးရောင်းပွဲတော်နှင့် ဓါတ်ပုံပြခန်းကို လှည့်လည်ကြည့်ရှုကြသည်။

     ယင်းနောက် အကအဖွဲ့များကို ပြည်ထောင်စုဝန်ကြီးနှင့် ပြည်နယ်ဝန်ကြီးချုပ်တို့က ဂုဏ်ပြုချီးမြှင့်ငွေ ပေးအပ်ချီးမြှင့်သည်။

     ထို့နောက် ပြည်ထောင်စုဝန်ကြီးနှင့် အဖွဲ့သည် အမျိုးသမီးနှင့် ကလေးဆေးရုံကြီး၊ တောင်ကြီး သို့ရောက်ရှိပြီး ဆေးရုံအုပ်ကြီး၊ အထူးကုဆရာဝန်ကြီးများ၊ သူနာပြုများ၊ ဝန်ထမ်းများနှင့် တွေ့ဆုံ၍ ပြည်သူ့ဆေးရုံများတွင်သာမက ကျေးလက်နေပြည်သူများအား မိခင်နှင့်ကလေး စောင့်ရှောက်ရေး လုပ်ငန်းများ၊ ကာကွယ်ဆေးထိုးလုပ်ငန်းများ၊ မကူးစက်နိုင်သော ရောဂါကာကွယ် နှိမ်နင်းရေးလုပ်ငန်းများအပါအဝင် ကျန်းမာရေးစောင့်ရှောက်မှု လွှမ်းခြုံနိုင်အောင် ကြိုးပမ်းဆောင်ရွက် ပေးလျက်ရှိပါကြောင်း၊ ကာကွယ် ဆေးဖြင့်ကာကွယ်၍ ရောဂါများကြောင့် သေဆုံးမှုမရှိစေရေးအတွက် ပုံမှန်ကာကွယ် ဆေးထိုး လုပ်ငန်းများအပြင် ဆေးရုံအခြေပြုကာကွယ်ဆေးထိုးလုပ်ငန်းများကိုလည်း တိုးမြှင့်ဆောင်ရွက်ကြရန် ဖြစ်ပါကြောင်း မှာကြားသည်။

     ထို့နောက် ပြည်ထောင်စုဝန်ကြီးနှင့်အဖွဲ့သည် စဝ်စံထွန်းပြည်သူ့ဆေးရုံကြီးသို့ သွားရောက်၍ လှည့်လည်ကြည့်ရှုခဲ့ပြီး လိုအပ်သည်များကို မှာကြားခဲ့ပါသည်။